नेवासा-श्रीरामपूर रस्त्यावर दोन अपघातात तिघांचा मृत्यू; मृतात पती-पत्नीसह डॉक्टरचा समावेश

श्रीरामपूर-नेवासा रस्त्यावर काल झालेल्या दोन वेगवेगळ्या अपघातामध्ये तिघांचा मृत्यू झाला. यात पती-पत्नीसह एका डॉक्टरचा समावेश आहे. नेवासा-श्रीरामपूर रस्त्यावर अपघात वाढल्याने चिंता व्यक्त केली जात आहे.

पती-पत्नी ठार

काल सकाळी अकरा वाजेच्या सुमारास नेवासा रोडवरील रेल्वे उड्डाण पुलाजवळील कुटे हॉस्पीटल समोर दुधाचा टँकर (क्र. एमएच 17 बीझेड 1221) वरील चालकाने अ‍ॅक्टीव्हाला (क्र. एमएच 17 सीजे 8524) पाठीमागून जोराची धडक दिली. या अपघातात अ‍ॅक्टीव्हा गाडीवरील सुनील थोरात व त्यांच्या पत्नी स्वाती थोरात गंभीर जखमी झाले. अपघातानंतर आसपासच्या नागरिकांनी या दोघांनाही तत्काळ श्रीरामपूर येथील साखर कामगार हॉस्पीटलमध्ये दाखल केले. परंतू येथील वैद्यकीय अधिकार्‍यांनी त्यांना मयत घोषित केले.

एकरुखे परिसरात शोककळा

या अपघातातील दुधाचा टँकर हा भरधाव वेगाने श्रीरामपूरकडे येत होता, असे स्थानिकांचे म्हणणे होते. या टँकर चालकाने अ‍ॅक्टीव्हा गाडीला जोराची धडक दिली. यामध्ये हा अपघात घडला. यामध्ये अ‍ॅक्टीव्हा गाडीचाही चक्काचूर झाला. याप्रकरणी श्रीरामपूर शहर पोलीस ठाण्यात अकस्मात मृत्यूची नोंद करण्यात आली. मयत सुनील थोरात यांच्या पश्चात मुलगा, मुलगी, भाऊ असा परिवार आहे. ते मुळचे राहाता तालुक्यातील एकरूखे येथील असून सध्या व्यवसायानिमित्ताने ते श्रीरामपूर येथे स्थायिक होते. त्यांच्यावर शोकाकूल वातावरणात अंत्यसंस्कार करण्यात आले.

डॉक्टरांचाही मृत्यू

दुसर्‍या घटनेत तालुक्यातील वडाळा महादेव येथील संजीवनी क्लिनिकचे डॉ. राजेंद्र सिताराम मैड (वय 49) यांचा सोमवारी (दि. 31) रात्री 10 वाजेच्या दरम्यान रस्ता अपघातामध्ये मृत्यू झाला. डॉ. मैड हे क्लिनिकमधील रूग्ण तपासणी करूण घरी जात असताना नेवासा रस्त्यावरील ओकवुड वायनरी परिसरात समोरुन भरधाव वेगाने येणाऱ्या अज्ञात दुचाकीने कट मारल्याने हा अपघात झाला. डॉ. मैड यांनी आपली दुचाकी फिरवत झाडाच्या दिशेने वळवली. त्यामध्ये त्यांच्या डोक्याला जबर मार लागल्याने डोक्यातून रक्तस्त्राव झाला. दुसर्‍याला वाचविण्याच्या प्रयत्नात स्वत:चा जीव गमावल्याचे स्थानिकांनी सांगितले. स्थानिक नागरीकांच्या माहितीवरून समोरचा दुचाकीस्वार नशेमध्ये असल्याने त्याची दुचाकी रस्त्याच्या कडेला पडलेली आढळून आली. डॉ. मैड यांना वैद्यकीय उपचारासाठी कामगार हॉस्पिटल येथे हलविले मात्र त्यांचाही मृत्यू झाला. या अपघाताची माहिती श्रीरामपूर शहर पोलीस ठाण्यात देण्यात आली.